Градскиот совет извести дека Русите фрлиле бомба врз Драмскиот театар во Мариупол, каде што се криеле жителите. Бројот на загинатите засега не е познат.
„Авионот фрли бомба врз зграда во која се криеја стотици цивили од Мариупол. Сè уште е невозможно да се процени обемот на овој ужасен и нехуман чин бидејќи продолжува гранатирањето на станбени области во градот. Познато е дека по бомбардирањето се урна централниот дел на Драмскиот театар, а шутот го блокираше влезот во прифатилиштето кое се наоѓа во зградата“, се вели во пораката објавена на каналот на Телеграм.
Тие наведуваат дека не се знае дали има преживеани и дека урнатините го блокираат влезот.
Серхи Орлов, заменик-градоначалникот на Мариупол, изјави за Би-Би-Си дека руското бомбардирање го погодило градскиот драмски театар, каде што биле засолнети цивили.
Тој проценува дека таму имало меѓу 1.000 и 1.200 луѓе. Бројот на загинатите се уште не е познат.
