Ученик во основно училиште во Лика, во Хрватска, најавил дека во понеделник ќе дојде на училиште со огнено оружје и со список, објави ХРТ. Тоа го направил затоа што не бил задоволен од оценките.
Заканата која по многу нешта потсетува на страшниот масакр што го изврши лани 13-годишниот Коста Кецмановиќ во белградското основно училиште „Владислав Рибникар“, предизвика страв и паника меѓу учениците и нивните родители. Родителите се загрижени за безбедноста на нивните деца. Од училиштето тврдат дека за случајот ги известиле надлежните и стручни служби и се пријавиле во полиција.
– Немаше да ви се јавиме да не бевме загрижени. Моето дете не сака да оди на училиште. Веќе се плаши, а сега уште повеќе се плаши дека некој ќе го убие – изјави мајка на еден ученик од Лика во изјавата за хрватските медиуми.
Директорката на училиштето соопшти дека бил извршен разговор со ученикот кој ја упатил заканата како и со неговите родители.
– Одделенскиот наставник писмено ги известил родителите дека се преземаат сите потребни активности, дека нема причина за загриженост и дека училиштето ќе продолжи да се грижи за безбедноста на учениците. Родителите на учениците од нашето училиште ќе бидат известени навремено за сите потребни информации – вели директорката на училиштето
Мајката на ученикот нагласува дека „тие се чувствуваат беспомошни бидејќи и претходно во училиштето во Лика имало вакви „неубави ситуации“.
„Очекувам општеството и надлежните повеќе да се ангажирааѕ и училиштето како училиште да посвети повеќе внимание околу заштитата на децата, бидејќи ова ги преминува сите граници на однесување, а сите молчиме, сите се прикриваме, а не знам зошто?“ – вели родител загрижен поради инцидентот.
Директорката најави дека ученикот кој ја упатил заканата, во понеделник нема да дојде во училиште и дека ќе одлучи што понатаму во консултација со стручните служби.
