Шверцуваните мобилни телефони ќе се развијат во интересен случај, смета Министерот за внатрешни работи Панче Тошковски кој сподели дел од своите сознанија.
– Факт е дека пред некој ден – минатата недела, имаше интересна акција спроведена од СВР Скопје, во делот на борба против трговија со дрога, при што беше откриена поголема пратка на одредена техничка роба – мобилни телефони. Станува збор за пратка од огромен број мобилни телефони, вредни огромна сума, којашто, според инфромациите што ги имам, не соодветствува со документацијата што треба да ја има Царината. Притоа, причинета е огромна штета по буџетот на Македонија – вели Тошковски.
Министерот информира дека веќе има отвoрено постапка за овој случај и дека процесот го води Обвинителството. Тој коментира дека досега нема ниту еден уапсен, но дека се надева оти набрзо ќе видиме и приведување на некој осомничен.
– Факт е дека огромен пропуст е сторен од страна на царинските служби. Дали било со умисла, дали бил од небрежност – тоа ќе покаже истрагата. Таму си постапува јавен обвинител, Министерството и сите други надлежни органи постапуваат по негова координација и се надевам дека во многу брзо време, за оние коишто го терале овој процес – подолг временски период, според информациите што ги имам, ќе се преземат соодветни мерки. А, притоа, буџетот на Македонија нема да биде оштетуван во иднина – вели Тошковски.
Тој додава дека според првичните информации, бројот на откриени телефони што се споменува, од информациите што ги добива, е преголем за потребите на Македонија, такашто се поставува прашањето дали тие телефони потоа стануваат дел од поголем шверц.
