Генералниот секретар на НАТО, Јенс Столтенберг, изјави во средата вечерта, по средбата со српскиот претседател Александар Вучиќ, дека НАТО ќе продолжи да го поддржува и обезбедува мирот во рамките на својот мандат на Косово, пренесоа белградските медиуми од Брисел.
Столтенберг во средата вечерта се сретна со Вучиќ и ги повика двете страни да ги намалат тензиите, нагласувајќи дека НАТО цврсто го поддржува дијалогот меѓу Белград и Приштина под покровителство на Европската унија.
Столтенберг рече дека Србија долго време е „доверлив партнер“ на НАТО и дека е убеден дека ќе се вклучи во дијалог на конструктивен начин.
Тој рече дека НАТО ќе ја продолжи својата мисија за обезбедување безбедност на движењето на сите жители на Косово.
Во исто време, осврнувајќи се на неодамнешните инциденти во кои беа повредени десетици членови на мисијата КФОР, тој предупреди дека нападите врз мисијата на НАТО се неприфатливи.
„Го зголемивме нашето присуство како одговор на зголемените тензии на северот на Косово и ќе продолжиме да обезбедуваме спроведување на нашиот мандат на непристрасен начин“, рече Столтенберг.
Српскиот претседател Александар Вучиќ по разговорот со Столтенберг изјави дека на Србија и требаат и КФОР и НАТО кои до сега професионално работат на Косово.
Вучиќ за белградските медиуми изјави дека никој во српската јавност „не забележал дека има правен проблем“, бидејќи според Резолуцијата 1244 на Советот за безбедност на ОН, ниту една вооружена формација освен КФОР не може да постои и да дејствува на Косово.
Наше е да се бориме и да го зачуваме мирот бидејќи имаме што да изгубиме“, изјави Вучиќ.
Граѓаните на Србија, додаде тој, не треба да се грижат, а српскиот народ на Косово го штитат три работи – единство, борба и храброст, бидејќи го поддржува државата Србија и меѓународното јавно право, чии норми, како што нагласи, „бара во мала мера да се почитуваат“.
Вучиќ за белградските медиуми изјави и дека се доставени сите писмени докази за тоа што му се случува на српскиот народ од доаѓањето на Албин Курти, нагласувајќи дека на средбата со Столтенберг побарал поголема безбедност за Србите на Косово.
Српскиот претседател истакна и дека не верува никому во Приштина „бидејќи нивната цел е да ја спроведат политиката на (поранешниот албански претседател) Енвер Хоџа, што значи „Косово без Срби“ и „обединување со Албанија“.
Вучиќ порача дека Србија мора да го зачува мирот за да напредува
„Се плашам дека не сме на пат кој би ни ја гарантирал безбедноста, но се надевам дека ова барање до НАТО ќе вроди со плод или барем поголемо внимание, бидејќи сигурен сум дека не сакаат Србите да бидат протерани од Косово“, посочи Вучиќ.
