Никола Јокиќ по трет пат е прогласен за најкорисен играч на НБА. Српскиот центар на Денвер Нагетс ја освои наградата МВП на главниот дел од сезоната во НБА лигата во 2021 и 2022 година, а откако минатата година ги предводеше Нагетс до титулата и беше МВП на финалето, сега е избран како најкорисен играч повторно.
Јокиќ, чиј тим моментално е во второто коло од плеј-офот на Западната конференција, сезоната ја заврши со просеци од 26,4 поени, 12,4 скока и 9,0 асистенции по натпревар.
Откако Јокиќ беше прогласен за најдобар, Денвер на социјалните мрежи објави емотивно видео во кое се појавува неговото семејство, а текстот го чита сопругата на Никола, Наталија. Видеото завршува со бакнеж кој го испрати нивната ќерка и вели: „Те сакам тато“.
„За другите, неверојатен талент. За нас, несебичен семеен човек. Оние кои не го познаваат, го гледаат како неконвенционален или неортодоксен, но ние секогаш го сметавме за неверојатен“, почнува сопругата на Јокиќ во видеото со наслов Како неверојатното стана возможно.
„Можеби ќе ви биде чудно што гордиот Србин, драфтуван на 41-то место во генерален пласман, постигна нешто што само неколкумина го постигнаа, но сè е можно ако играте со картите правилно. Зад лузните и насмевките се крие работата, се крие вербата дека ќе бидете одлични. И секогаш ќе веруваме во нашиот сега трикратен МВП“, истакна Наталија Јокиќ.
Но, не беа сите оценки за Јокиќ позитивни. Познатиот кошаркар Шекил О Нил, кој работи како стручен аналитичар за „ТНТ Спортс“, кажа дека наградата требало да му припадне на Шеј Гилџес-Александер.
– Морам да кажам дека Шеј ја заслужи наградата. Никола Јокиќ е најдобриот центар во лигата, но не требаше да ја добие МВП-наградата. Гилџес-Александер оваа сезона имаше 50 меча со најмалку 30 поени, а неговиот тим беше прв на табелата – кажа Шекил.
