Американските сили нападнаа објекти што ги користат проиранските групи во Ирак како одговор на нападите врз американскиот персонал во Ирак и Сирија, потврди министерот за одбрана Лојд Остин.
Нападите се случија само неколку дена откако американските трупи во западен Ирак беа цел на балистички ракети и ракети. Пентагон ги обвини силите поддржани од Иран за нападот.
„Американските воени сили извршија пропорционални напади врз три објекти во Ирак што ги користат милитантната група Катаиб Хезболах поддржана од Иран и други групи поврзани со Иран“, рече Лојд Остин.
„Овие прецизни напади се директен одговор на серијата напади врз персоналот на САД и коалицијата во Ирак и Сирија од страна на милициите поддржани од Иран. Не сакаме да ескалираме конфликтот во регионот, но сме целосно подготвени да преземеме дополнителни мерки за заштита на нашиот народ и објекти“, додаде Остин.
Централната команда на американската војска соопшти дека нападите биле насочени кон штабови, магацини и места за обука на Катаиб Хезболах за напади со ракети и беспилотни летала.
Американските и сојузничките сили во Ирак и Сирија биле цел на повеќе од 150 напади од средината на октомври, според Пентагон, а Вашингтон извршил одмазднички напади во двете земји, вклучувајќи го и убиството на проиранскиот командант во Багдад претходно оваа месец.
Тој напад особено ја вознемири ирачката влада, а нејзиниот претседател Мохамед Шија ал Судани ја повика коалицијата против Исламската држава предводена од САД да го напушти Ирак. САД има околу 2.500 војници таму и 900 во Сирија.
