Компанијата Рио Тинто соопшти дека се работи за „апсолутно неточна информација“, која викендов ја изнесоа противниците на проектот Јадар, дека поради тоа ќе бидат раселени повеќе од 100.000 луѓе.
„Проектот влијае на 52 домаќинства со постојани жители, од кои 51 доброволно се продадени на Рио Тинто. Овие домаќинства се веќе преселени со сеопфатна поддршка на нашата компанија“, изјави Рио Тинто.
Тие, исто така, „жестоко“ ги негираа тврдењата кои ги поврзуваат со коруптивни деловни практики.
Имаме строги и јасно дефинирани деловни правила и не толерираме никакво кршење на истите, особено кога станува збор за корупција“, велат од компанијата.
Велат и дека „нема основа тврдењата дека компанијата Рио Тино има деструктивно влијание врз животната средина во сите земји во кои работи“.
„Редовно ја информираме домашната и меѓународната јавност за нашите активности во Србија, но и за активностите поврзани со нашето деловно работење во другите делови на светот. Оваа информација се доставува до надлежните регулаторни тела, се споделува преку комуникација со меѓународните граѓански организации и редовно се објавува на веб-страницата на нашата компанија. Ова ги вклучува податоците што ги споделуваме кога станува збор за влијанието на нашите деловни операции врз водата, земјиштето, земјоделството и биодиверзитетот, како и податоци за мерките за ублажување и елиминирање на овие влијанија“, вели Рио Тинто.
Тие исто така додаваат дека „постојаните напори на активистите да пласираат лажни, неточни или нецелосни информации за компанијата Рио Тинто без никакви докази целосно ја поткопуваат можноста да се разговара за еколошките, економските и технолошките аспекти на проектот Јадар врз основа на факти“.
„Ваквите неосновани тврдења спречуваат придобивките што може да ги донесе Проектот да се гледаат на сеопфатен и објективен начин.
Проектот Јадар може да отвори илјадници висококвалификувани и високо платени работни места во регионот на Лозница, но и низ цела Србија, преку директно вработување и поддршка на локалните бизниси. Општина Лозница би остварила значителен директен бенефит од рента и даночните придонеси кои би можеле да се реинвестираат во понатамошен инфраструктурен и економски развој. Проектот може да стимулира и нови инвестиции во други сектори на зелената економија во Србија, со што би се зголемила вработеноста и бруто социјалниот производ и би се поттикнало понатамошен развој на локалниот персонал и работните вештини“, се вели во соопштението.
Тие исто така наведуваат дека во изминатите шест месеци во Лозница и околните градови организирале јавни состаноци на кои присуствувале повеќе од 2.500 членови на заедницата „и каде имавме можност да имаме конструктивни, позитивни дискусии“. Секој од овие настани беше отворен за пошироката јавност, вклучително и здруженија“.
„За да ја покажеме нашата подготвеност за отворена дискусија, ние сме исто така подготвени јавно да ја објавиме нацрт-Студијата за оцена на влијанието врз животната средина во нејзината сегашна форма за понатамошна поддршка на јавниот дијалог за проектот Јадар. Нагласуваме дека регулаторниот процес, кој вклучува јавна ревизија, беше прекинат во јануари 2022 година. Проектот Јадар ќе се развива на безбеден и одговорен начин и со целосна подготвеност да го поддржи учеството на локалната заедница во транспарентното следење на сите влијанија на проектот врз животната средина. За да спречиме натамошно ширење на лажни информации и обвинувања, како и да го заштитиме угледот на нашата компанија, ќе ги искористиме сите расположливи правни механизми“, се вели во соопштението на Рио Тинто.
