Нацрт-статус за Заедницата на српски општини(ЗСО) кој нема да го крши Уставот на Косово ќе биде доставен до Уставниот суд во Приштина до крајот на мај. Косово подготви свој нацрт за ЗСО, а формирањето на оваа заедница е услов за приемот на Косово во Советот на Европа.
Министерката за надворешни работи и дијаспора на Косово, Доника Гервала, изјави дека преку писмо го информирала Советот на Европа дека Косово подготвува нацрт статут за формирање „механизам за самоуправување, координација и соработка на општините со српско мнозинство на Косово (ЗСО)“, пренесува Ал Џезира.
„Нацртот обезбедува не само целосно почитување на Уставот и законите на Република Косово, туку во исто време спречува неовластени интервенции однадвор, како во општините на Косово, така и низ целата земја“, напиша Гервала на Фејсбук.
Нацртот за кој се вели дека е правен во претходен нацрт на Фондацијата „Фридрих Еверт’ предвидува дека
ЗСО има Собрание, претседател, потпретседател, Совет и Управен одбор на Заедницата.
Целите на тоа тело се зајакнување на локалната демократија, овозможување, финансирање или промовирање активности кои го подобруваат учеството на граѓаните и демократската практика, како и застапување интереси важни за локалната демократија.
Во документот се предвидува дека ЗСО ќе има статус на правно лице, што, како што се наведува, а тоа право со законски акт треба да му го додели Владата на Косово.
Според документот на германската организација, ЗСО ќе се финансира од придонесите на своите членови, приходите од услугите што ги дава, движен или недвижен имот, трансфери од централни власти, грантови, донации, како и финансиска поддршка од други здруженија и организации, домашни и меѓународни, вклучително и Србија.
Парламентарното собрание на Советот на Европа усвои препорака за прием на Косово во таа организација, а потоа беше соопштено дека конечната одлука се очекува на 17 мај и дека Косово треба да ги обезбеди гласовите на две третини од 46-те членки за прием во Политичкиот комитет на Советот на Европа.
Комитетот на министри на Советот на Европа заседава на 16 и 17 мај во Стразбур. Ова тело го дава последниот збор за прифаќање на една земја во советот.
