Пожарот што избувна на танкер со нафта во Балтичкото Море, во близина на германскиот брег, е успешно изгаснат, соопштија денеска локалните власти.
Во петокот наутро поморската спасувачка служба била алармирана за пожар на бродот „Аника“ под германско знаме, а недолго потоа од бродот ги извлекле сите седум членови на екипажот. Од брегот се гледаше црн чад од цистерната која превезуваше околу 640 тони нафта.
Најверојатно пожарот избувнал во машинскиот простор или во магацинот и се проширил на преградата на бродот.
Во петокот попладне експертите утврдиле дека состојбата на бродот е стабилна и властите одлучиле да го влечат до пристанишниот град Росток за да продолжат со гаснењето на пожарот.
Пожарникарите го прегледале бродот долг 73 метри откако пристигнал во пристаништето и утврдиле дека пожарот е изгаснат, соопшти германската централна команда за поморски вонредни ситуации.
