По неуспешниот обид во 2011 година Палестинската самоуправа сега повторно побара да стане полноправна членка на Обединетите нации, се вели во писмото испратено вчера до генералниот секретар на ОН, Антонио Гутереш.
„Денес, државата Палестина, како што е наложено од палестинското раководство, испрати писмо до генералниот секретар во кое бара повторно разгледување на апликацијата за членство“ – се вели во соопштението објавено во вторникот на палестинската постојана набљудувачка мисија во ОН на платформата за социјални медиуми X, поранешен Твитер.
Објавувањето вклучува писмо, потпишано од палестинскиот амбасадор во ОН, Ријад Мансур, во кое се повикува палестинската апликација за полноправно членство од 2011 година повторно да биде поднесена до Советот за безбедност во април.
Палестинската управа поднесе барање за полноправно членство во ОН во септември 2011 година, но не успеа да добие 9 гласови потребни за одобрување во моќниот Совет на ОН од 15 земји. САД се заканија дека ќе стават вето на барањето.
САД и другите западни сили предупредија дека признавањето на палестинската држава од ОН ќе ги поништи претходните договори за поддршка на преговорите меѓу Израел и Палестинците за формирање на палестинска држава која ќе живее во мир заедно со Израел.
Во 2012 година, во Генералното собрание на ОН имаше 138 гласови за, 9 против и 41 воздржан, за да и се додели на Палестина „статус на земја-набљудувач не-членка“ и покрај противењето на САД, кои таму немаат право на вето. Палестина досега ја признаа 139 земји-членки на ОН, од вкупно 193 членки.
Минатиот месец Шпанија објави дека се договорила со Малта, Ирска и Словенија да ги преземе првите чекори кон признавање на палестинската државност во окупираниот Западен Брег и Појасот Газа. На 22 март, шпанскиот премиер Педро Санчез разговараше во Брисел со премиерите на Ирска, Словенија и на Малта, кои најавија признавање на Палестина „кога ќе се создадат соодветни околности“.
Во вторникот Санчез им рече на новинарите дека Шпанија ќе ја признае независноста на Палестина до јули и дека наскоро може да се создаде „критична маса“ во рамките на Европската унија, така што и другите земји ќе го сторат истото, пренесе шпанската новинска агенција ЕФЕ.
