Градежните работници заробени во урнат тунел во северна Индија веќе 10-ти ден конечно добија топли оброци, испорачани преку челична цевка, додека спасувачите работат на алтернативен план да копаат кон нив вертикално, пренесува АП.
Оброците, направени од ориз и леќа, биле испратени преку цевка од 15,24 см, која била протуркана низ урнатините доцна во понеделникот, изјави портпаролката на индиската влада Дипа Гаур.
Последните девет дена работниците преживуваат со сува храна која се хранела низ тесна цевка. Кислородот им се доставува преку специјална цевка.
Официјалните лица објавија видео во вторникот, откако камерата беше протурена низ цевката, на која се гледаат работниците со цврсти капи како се движат во блокираниот тунел додека комуницираат со спасувачите на теренот преку воки-токи.
Нивните семејства се сè позагрижени и фрустрирани додека се одолговлекува спасувачката операција, пишува АП.
Тунелот се урна во државата Утараханд, планински регион што се покажа како предизвик за машината за дупчење која се расипа додека спасувачите се обидуваа да копаат хоризонтално кон затрупаните работници.
Вибрациите со висок интензитет на машината, исто така, предизвикаа паѓање на повеќе остатоци, што ги натера официјалните лица накратко да ги прекинат спасувачките напори.
