Претседателот на државата Стево Пендаровски на својот Фејсбук профил сподели фотографија од потпишувањето во книгата на жалост во Лондон.
„Со сопругата оддадовме почит на посмртните останки на Кралицата Елизабета Втора, пред утрешната погребна церемонија во Вестминстерската опатија. Голема почит за децениите во служба на народот и за тоа што беше пример за лидерство, скромност и великодушност. Нека почива во мир“ – напиша Пендаровски на својот Фејсбук-профил.
Пендаровски во Лондон утре ќе присуствува на погребот на кралицата во Вестминстерската палата. Кралицата Елизабета втора почина на 96-годишна возраст на 8 септември. Таа беше монарх со најдолго владеење во британската историја и најстар шеф на држава во светот.
