Водачот на Хамас Исмаил Ханије во средата потврди дека тројца негови синови биле убиени претходно истиот ден од израелски воздушен напад во Појасот Газа, пишува Њузвик.
– Му благодарам на Бога за оваа чест што ни ја укажа со мачеништвото на моите три сина и некои внуци – изјави Ханије од Катар коментирајќи ја смртта на своите чеда.
За време на разговорот со Ал Џезира, шефот на Хамас рече и дека смртта на неговите синови ќе биде искористена како мотивација за каузата на Хамас.
– Нивната чиста крв е за ослободување на Ерусалим и Ал Акса, а ние ќе продолжиме да маршираме по нашиот пат и нема да се колебаме. Со нивната крв носиме надеж, иднина и слобода за нашиот народ и нашата кауза.
Ханије се осврна на барањата на Хамас:
– Нашите барања се јасни и конкретни и нема да правиме отстапки за нив. Непријателот ќе биде во заблуда ако мисли дека таргетирањето на моите синови, во кулминацијата на преговорите и пред движењето да го испрати својот одговор, ќе го натера Хамас да ја промени својата позиција.
Шефот на Хамас, исто така, рече дека неговата група нема да ги повлече своите барања за траен прекин на огнот и враќање на раселените Палестинци во нивните домови.
Тој додаде:
– Крвта на моите синови не е подрага од крвта на нашиот народ…Сите маченици на Палестина се мои деца.
ТВ Ал Акса, станица управувана од палестинската милиција Хамас, објави дека Хазем, Амер и Мохамед Ханије биле убиени заедно со другите членови на семејството во нападот во близина на бегалскиот камп Шати во градот Газа.
Според извештајот на ТВ Ал Акса, браќата се возеле во возило кое било погодено од израелски дрон. Во инцидентот, како што е соопштено, се убиени и ќерката на Хазем Ханије и синот и ќерката на Амир.
Ханије еднаш беше премиер на Палестинската управа пред да биде разрешен од функцијата од претседателот на групата Махмуд Абас во 2007 година. Во 2017 година Ханије беше избран за претседател на политичкото биро на Хамас.
Асошиејтед прес (АП) ги нарече синовите на Исмаил Ханије како „меѓу личностите од највисок профил што беа убиени во војната“ што започна откако Хамас го предводеше ненадејниот напад врз Израел на 7 октомври.
