За време на високите летни температури добар дел од населението на Аргентина остана без струја. Причина за ова е пожар кој ја зафатил електричната мрежа.
Половина од втората по големина земја во Јужна Америка, Аргентина, остана без струја во средата попладне откако пожар ја зафати електричната мрежа на нацијата. Според аргентинскиот весник La Nacion, без струја останале 40 отсто од корисниците или повеќе од шест милиони домаќинства и 20 милиони луѓе.
За време на топлотниот бран, без струја останаа жителите на главниот град Буенос Аирес и регионите во внатрешноста на Аргентина: Санта Фе, Нојкен, Кордоба и Мендоза, резимира пораката на Државната служба за енергетика на новинската агенција Ројтерс.
Според британскиот Би-Би-Си, првично се запалил на отворено, а пожарот ги зафатил и клучните далноводи во крајбрежната област, а стопирана е и работата на нуклеарната централа. Министерството за економија веќе побара истрага која ќе се занимава со прашањето како настанал пожарот.
Недостигот на струја најмногу го почувствувале жителите на големите градови, наведуваат и споменатите британски медиуми, додавајќи дека во текот на ноќта во градското подрачје на Буенос Аирес се уште имало околу 150.000 луѓе без струја.
Со оглед на тоа што моментално е лето во Аргентина, температурите во некои делови од земјата опстојуваат над 35 степени Целзиусови, што исто така ја зголемува побарувачката за електрична енергија. Кога снема струја во средата, затворија неколку гранки и ја прекинаа наставата. La Nacion известува и за „колапс“ на транспортот и затворање на фабриките.
Големите прекини на струја не се сосема невообичаени во Аргентина. Во 2019 година, десетици милиони луѓе останаа без струја во Аргентина и во соседниот Уругвај, а една година подоцна, голем прекин во снабдувањето со електрична енергија беше забележан во главниот град на Аргентина, Буенос Аирес. Таму стотици илјади луѓе останаа без струја, пишува Би-Би-Си.
