Генералниот секретар на Обединетите нации, Антонио Гутереш, предупреди на претстојната „голема фрактура“ во светот, наведувајќи дека постоечките глобални структури на управување не му служат на свет кој постојано се менува, пренесува Си-Ен-Ен.
Говорејќи пред светските лидери во Генералното собрание на Обединетите нации во вторникот, Гутереш повика на големи промени во мултилатералните институции, вклучително и реформа на моќниот Совет за безбедност во срцето на Обединетите нации и редизајн на глобалните финансиски системи.
„Алтернативата на реформите не е статус кво. Алтернативата на реформите е дополнителна фрагментација“, рече Гутереш.
Гутереш ја опиша зголемената глобална мултиполарност како најава за „нови можности за правда и рамнотежа во меѓународните односи“ и признавање на подемот на новите сили во светот како што се Индија и Кина, како и зголемената преговарачка моќ на регионалните блокови.
Но, новите и зајакнати мултилатерални институции ќе бидат сè поважни за обезбедување мир во мултиполарниот поредок, додаде тој.
Според неговото мислење, Советот за безбедност на Обединетите нации и договорот од Бретон Вудс сè уште ги одразуваат нееднаквите односи на моќ од 1945 година, „кога многу земји во оваа собраниска сала сè уште беа под колонијална власт“.
Советот за безбедност се состои од пет постојани членки: САД, Велика Британија, Франција, Кина, Русија и 10 ротирачки членки. Само еден лидер од петте постојани членки, американскиот претседател Џо Бајден, одлучи да присуствува на Генералното собрание на ОН оваа година.
Повеќе од 50 земји на ОН никогаш не биле членки на Советот за безбедност.
