Пратеникот на Европскиот парламент (ЕП) Лукас Мандл рече дека дијалогот меѓу Приштина и Белград е „дијалог меѓу две држави, а не два града“.
Во Приштина, на седницата на парламентарниот комитет за стабилизација и асоцијација со ЕУ и Косово, Мандл рече дека Косово и Србија се „две земји“.
„Дијалогот меѓу Приштина и Белград е на дневен ред. Го познавам овој јазик многу добро, но верувам дека ова не е дијалог меѓу два града. Мораме јасно на почетокот да кажеме дека ова е дијалог меѓу две земји“, рече австрискиот претставник.
Тој оцени дека ЕУ тоа треба да го истакне и дека е важно Брисел да посредува во дијалогот.
„Не треба да ја потценуваме позитивната улога на САД во дијалогот, како вистинска поддршка за дијалогот со посредство на ЕУ“, рече европратеникот.
Тој оцени дека Косово ги исполнува „сите критериуми“ за визна либерализација, што, според него, повеќе пати го потврдува и Европската комисија.
„Вчера нашиот колега Хаки Абази рече дека прашањето за визната либерализација може да се користи како услов во дијалогот Косово-Србија. Се надевам дека тоа не е точно бидејќи би било неправедно за Косово“, рече европратеникот.
