Нешто по полноќ бил пријавен пожар во станбена зграда во кругот на инфективната клиника во Белград, при што едно 60-годишно лице го загубило животот, додека уште едно пренесено во болница.
– Една екипа згрижи еден пациент и го пренесе во Воено медицинската академија, а друга екипа остана на местото на пожарот за време на гаснењето и на крајот само констатиравме смрт на едно лице – изјави докторката Ивана Стефановиќ.
Како што пренесуваат српските медиуми, пожарот избил поради маслен радијатор, при што биле уништени пет станови.
Пожарникарите брзо реагирале, но не е познато дали пожарот претставувал закана да се префрли на Клиниката за инфективни и тропски болести на Клиничкиот центар.
Според информациите, интервенирале две екипи на Брза помош при што на лице место било пронајдено едно јагленосано тело, додека една жена е пренесена во ВМА.
– Беше електричар и постар човек. Претходно тој има работено во техничката служба на Клиничкиот центар – велат соседите на починатиот.
Дури 38 пожарникари синоќа се бореле со стихијата која ја голтала зградата. Во моментов во зградата има две екипи пожарникари кои ја следат состојбата на терен.
