Профитот на H&M падна за речиси 90 отсто во кварталот.
Шведскиот текстилен гигант Hennes & Mauritz (H&M) во третиот овогодишен деловен квартал оствари нето добивка од 531 милион круни (48,6 милиони евра), што е за 89 отсто помалку во однос на истиот период лани. Како што објаснуваат од компанијата, падот е резултат на запирање на продажбата, а потоа повлекување од рускиот пазар.
Вториот најголем продавач на облека во светот е само една од компаниите на развиениот Запад што го напушти рускиот пазар по руската инвазија на Украина во февруари оваа година.
H&M ја запре продажбата во своите продавници во Русија во март и објави во јули дека ќе ги затвори операциите во земјата, но привремено повторно ги отвора продавниците за да ги продаде преостанатите залихи.
Извршниот директор на текстилниот гигант, Хелена Хелмерсон, сега објасни дека нивниот трет деловен квартал бил под влијание на настаните во Русија.
Кога беа објавени деловните резултати, групата објави дека ќе започне програма за намалување на трошоците, со која сака да заштеди две милијарди круни (182,7 милиони евра).
