Сенатот на САД во средата го одобри пристапувањето на Финска и Шведска во НАТО, најзначајното проширување на 30-члената алијанса од 1990-тите, што дојде по руската инвазија на Украина.
Сенатот со 95 гласа „за“ и 1 „против“ гласаше за поддршка на ратификацијата на пристапните документи на двете земји, значително надминувајќи го двотретинското мнозинство од 67 гласови потребни за ратификација, пренесува Ројтерс.
Шведска и Финска аплицираа за членство во НАТО како одговор на руската инвазија на Украина, која постојано ги предупреди двете земји да не се приклучат на алијансата.
Сите 30 членки на НАТО го потпишаа Протоколот за пристап за Шведска и Финска во јули, дозволувајќи им да се приклучат на нуклеарно вооружената алијанса предводена од САД откако нејзините членки ќе ја ратификуваат одлуката.
Благодарение на протоколот, Хелсинки и Стокхолм можат да учествуваат на состаноците на НАТО и да имаат поголем пристап до разузнавачките информации, но не се заштитени со членот пет, одбранбената клаузула на НАТО, според која нападот врз еден сојузник е напад на сите.
Пристапувањето на Финска и Шведска мора да биде ратификувано од парламентите на сите 30 членки на Организацијата на Северноатлантскиот договор пред двете земји да бидат заштитени со одбранбената клаузула.
Ратификацијата би можела да потрае и до една година, иако неколку земји веќе ја одобрија, вклучително и Канада, Германија и Италија.
Сенаторите од двете партии силно го поддржаа членството на двете земји, опишувајќи ги како важни сојузници чии модерни војски веќе тесно соработуваа со НАТО.
„Квалификациите на овие две просперитетни, демократски нации се извонредни и ќе служат за зајакнување на НАТО алијансата“, рече демократскиот сенатор Боб Менендез, претседател на Комитетот за надворешни односи, барајќи поддршка пред гласањето.
Водачот на мнозинството во Сенатот Чак Шумер ги покани амбасадорите и другите дипломати од Финска и Шведска во Сенатот да присуствуваат на гласањето.
