Европската унија и Нов Зеланд ги завршија преговорите за договор за слободна трговија што би можел да го зголеми бизнисот на двајцата партнери во областа на стоки и услуги за 30 отсто.
Ова го соопшти претседателката на Европската комисија Урсула фон дер Лајен по средбата во Брисел со новозеландската премиерка Џасинда Ардерн, која рече дека поминале 14 години откако за прв пат беше претставена идејата за таков договор.
Преговорите за слободна трговија започнаа во средината на 2018 година и, за ЕУ, договорот ќе ја стави трговијата на блокот со Нов Зеланд на исто ниво со земјите кои веќе имаат трговски пакт со Нов Зеланд, особено оние од 11-члениот Пацифички синдикат CPTPP .
Договорот ќе ги укине царините за широк асортиман на производи и ќе биде прв склучен од ЕУ, кој вклучува можност за санкции доколку која било од страните ги прекрши еколошките или работничките стандарди.
Ќе се укинат царините за извоз од ЕУ на производи како свинско месо, вино, чоколадо, слатки и бисквити. ЕУ ќе се отвори за повеќе млечни производи и говедско месо од Нов Зеланд, што е чувствителна област за некои земји од ЕУ.
„Веројатно е фер да се каже дека никому тоа не му се допаѓа, така што секако постигнавме добар договор“, рече полушегично министерот за трговија на Нов Зеланд, Демијан О’Конор, на прашањето за компромисите направени во тешката, последна фаза од преговорите.
