Поранешниот бугарски премиер и лидер на ГЕРБ Бојко Борисов изјави дека веднаш ќе го врати мандатот за формирање влада штом го добие, јавува БГНЕС.
– Не сакам повеќе да се занимавам со оваа држава, категорично го повлекувам барањето да бидам кандидат за премиер. Со олеснување го чекаме премиерот кој ќе биде еднакво одвоен од партиите на власт – обзнани Борисов на брифинг пред новинарите.
Тој вели дека одговорот на ПП-ДБ покажува дека може да се создаде проевропска влада со Преродба, ИТН, МЕЧ и сите други и дека во одговорот „категорично се вели дека во мене не гледаат добар лидер и премиер“.
– Категорично одбивам да се занимавам со сите проблеми што ни ги подметна Промена за четири години. Милијардите долгови, хаосот во државата, партизираните институции, неуправуваните и неконтролирани процеси кои се водат. Верувам дека ми прават голема услуга – рече Борисов.
Тој потсети дека во понеделникот изјавил дека за 2-3 месеци може да ја извади Бугарија од калта.
– Велат дека е неприфатливо – веќе и за мене е неприфатливо. Велат дека стојат на својот став за премиер еднакво оддалечен од партиите. Помогнете ми – кој е тој, кое е тоа име? Сакам да се натпреварувам со него. Кој е овој вонземен и моќен човек? Зошто не го ставија на маса, за да им кажам дали ќе го прифатиме или не. Плукнете го камчето да видам кој е – рече Борисов.
Тој додаде дека со големо олеснување вели дека повеќе не е кандидат и не сака да се занимава со „оваа партизирана земја“.
– Новото мнозинство на ПП-ДБ ќе биде со Преродба, а премиер ќе биде Силви Кирилов. Сигурно тој ќе се справи подобро со Брисел од мене – рече Борисов и додаде дека „тие момчиња нè фрлија во оваа криза од која нема оправање“.
