Русија бомбардира бродови кои превезуваат храна во Газа, тврди британското разузнавање. Нападите на Кремљ врз пристаништата во Украина го одложија доставувањето на витална помош до палестинските цивили, изјавија британските власти. Премиерот на Велика Британија, сер Кир Стармер, рече дека доказите покажуваат дека Владимир Путин е „подготвен да се коцка со глобалната безбедност на храната“ во неговата потрага по победа.
Британското разузнавање откри дека бродовите со жито што ја снабдуваат Газа станаа „колатерална штета“ за време на руските ракетни напади, пишува „Дејли Телеграф“.
Според официјални претставници на одбраната, најмалку четири трговски бродови биле погодени од бомби на Кремљ за девет дена помеѓу 5 и 14 октомври, меѓу нив и контејнерски брод под знамето на Панама кој превезувал сончогледово масло како дел од пратка на Обединетите нации.
Британските разузнавачки служби открија дека Русија исто така погодила бродови што превезувале жито наменето за Египет и пратки на Светската програма за храна во Јужна Африка. Погодени се и два брода со пченка.
Украина е вториот најголем снабдувач на пченка во Кина. Товарниот брод Пареза, кој плови под знамето на Сент Китс и Невис, е оштетен од руски ракетен напад, во пристаништето Пивденни, во регионот Одеса.
Кир Стармер објави дека Велика Британија обезбедува дополнителни 2,26 милијарди фунти за Украина за да ѝ помогне на земјата да продолжи со воените напори.
Стармер ги нарече очајнички чин наводите дека Русија ќе користи војници на Северна Кореја на фронтот во Украина.
