Ураганот Берил, кој вчера беснееше низ островските земји на југоисточниот дел на Карибите, однесе најмалку еден загинат во Гренадините, јавува Си-Ен-Ен. Во меѓувреме, првиот јунски ураган се засили до потенцијално катастрофален ураган од петта категорија, јавуваат странските новински агенции.
„Јачината на ураганот најверојатно ќе варира во текот на следниот ден, но се очекува Берил да остане исклучително опасен ураган додека се движи низ источниот дел на Карибите“, соопшти во понеделникот Националниот центар за урагани на САД. Набргу потоа, тој беше означен како максимален ураган од 5-та категорија.
Најмалку едно лице загина, а стотици домови и згради се оштетени во Сент Винсент и Гренадини, објави во понеделникот вечерта премиерот Ралф Гонсалвес, предупредувајќи дека бројот на жртвите може да се зголеми. Ураганот Берил зад себе остави огромно количество уништување, болка и страдање низ целата земја, додаде тој.
Ураганот Берил остави без струја околу 95 отсто од островот Гренада. Телекомуникациите се во прекин низ Гренада, а некои поединци ја загубија интернет услугата, според Си-Ен-Ен. Пустош е пријавен и од другите околни острови.
Ураганот со себе донесе ветрови со брзина од 261 километар на час и полека се движи во правец на Јамајка, каде ветерот би можел да се засили.
Експертите предупредуваат дека ова е прв пат во историјата да биде забележан ваков силен ураган на почетокот на сезоната. Вообичаено, такви силни урагани се појавуваат во регионот до септември, кога температурата на морето е највисока.
