Земјите-членки на Европската унија во четвртокот се договорија за 14-тиот пакет санкции против Русија, кој вклучува нови насочени мерки и забрана за извоз на течен гас во трети земји преку ЕУ, објави белгиското претседателство.
„Амбасадорите на ЕУ штотуку се договорија за силен и значаен 14-ти пакет санкции како одговор на руската агресија врз Украина“, објави ротирачкото белгиско претседателство на социјалната мрежа Х.
Најновиот пакет вклучува „нови насочени мерки и ги затвора дупките“ за да се избегнат санкциите наметнати досега, додаде претседателството.
Забраната за извоз на течен гас во трети земји преку морските води на ЕУ е првата мерка поврзана со ЛНГ.
Сепак, компаниите од земјата-членка сепак ќе можат да купуваат руски течен гас за европскиот пазар.
Со новите санкции, ЕУ вели дека настојува дополнително да го ограничи профитабилниот бизнис со извоз на течен гас и да ја ограничи способноста на Русија да ја финансира војната против Украина со овие средства.
Дополнително, беа договорени построги мерки за санкционирање на заобиколувањето и затворање на дупките што останаа отворени во 13 претходни пакети санкции.
