Палестинската група Хамас доцна во понеделникот објави дека одлуката на израелската влада да го распушти воениот кабинет, кој беше формиран да управува со војната во Појасот Газа, е победа на палестинскиот отпор, јавува Анадолија.
Изат ал-Ришк, член на политичкото биро на Хамас, рече дека вооружениот отпор, предводен од вооруженото крило на Хамас, Бригадите Ал-Касам, „го разби воениот кабинет на ционистите (израелските) кој беше формиран пред осум месеци за да го разбие (палестинскиот ) отпор“.
Тел Авив во понеделникот објави дека премиерот Бенјамин Нетанјаху го распуштил воениот кабинет, кој беше формиран на 11 октомври минатата година, само неколку дена откако Израел и објави војна на Газа.
Тоа доаѓа откако опозицискиот лидер Бени Ганц поднесе оставка од владата за вонредни состојби претходно овој месец поради несогласувањата околу повоената стратегија за Појасот Газа.
Воениот кабинет првично го сочинуваа Нетанјаху, Ганц, министерот за одбрана Јоав Галант, Рон Дермер, Гади Ајзенкот и лидерот на партијата Шас, Арје Дери.
Во израелските напади врз Појасот Газа од 7 октомври, загинаа 37.347 Палестинци, а беа ранети 85.372 лица.
Израел е обвинет за геноцид пред Меѓународниот суд на правдата (МСП), кој во својата последна одлука му нареди на Тел Авив веднаш да ја прекине операцијата во Рафах, каде што повеќе од еден милион Палестинци побараа засолниште од војната.
