Собраниската Комисија за финансирање и буџет на денешната седница разгледа вкупно 47 амандмани за Предлог-буџетот за 2024 година поднесени од опозициските партии, најголем дел од ВМРО-ДПМНЕ, и сите ги одби.
За Предлог-буџетот за следната година се поднесени вкупно 272 амандмани од овластени предлагачи, од кои 250 се од пратениците на ВМРО-ДПМНЕ и Коалицијата, прифатени се 3 амандмани, од кои само еден од опозицијата, додека, од поднесени 15 комисиски амандмани, прифатен бил еден.
Предлог-буџетот за следната година тежи 5,5 милијарди евра. Вкупните приходи во 2024 година се планирани на ниво од 310,1 милијарди денари и истите се за 10% повисоки во однос на 2023 година, додека расходите се планирани на ниво од 343,6 милијарди денари или за околу 5,8% повисоки во однос на 2023 година. Вкупните расходи се планирани на ниво од 343,6 милијарди денари или се за 5,8% повисоки во однос на 2023 година.
За плати планирани се 41,2 милијарди денари, за стоки и услуги планирани е износ од 25,3 милијарди денари, за тековни трансфери и субвенции 215,3 милијарди денари. За социјални трансфери проектирани се 161,1 милијарди денари, од кои за исплата на пензии 83,6 милијарди денари, за надоместоци за социјална заштита на најранливите слоеви на населението околу 13,2 милијарди денари. Растот на економијата е проектиран на ниво од 3,4 %, а инфлацијата на ниво до 3,6%.
По завршување на амандманската расправа, Предлог-буџетот треба да се најде на усвојување на пленарна седница. Согласно утврдените рокови, Буџетот за наредната година треба да биде усвоен во Собранието најдоцна до 31 декември.
