Новите сознанија за случувањата на Онкологија, кои ги обелодени ВМРО-ДПМНЕ, ја наметнуваат потребата да се испитаат сите нови информации и да се продолжи рокот на работата на Анкетната комисија и да се прошири опфатот на периодот на кој таа се однесува – побара денеска Рашела Мизрахи, претседателка на собраниската Анкетна комисија за испитување на работата на Клиниката за онкологија, на која денеска ѝ истекува последниот ден определен за сослушување сведоци и експерти.
Мизрахи вели дека досега се сослушани 49 сведоци и експерти, а 10 лица не се појавиле иако биле уредно поканети и имале обврска да се појават.
„Во текот на вчерашниот ден беа објавени нови сознанија за случајот со Онкологија, од кои може да се заклучи дека станува збор за основани сомневање за метастазирано диво месо во здравствениот систем и владеење на канцер мафијата. Тоа се нови информации и сознанија од кои се јасни три работи:
Првата, Фондот за здравство нарачал и изготвил извештај од кој јасно се гледа дека скандалозното работење на Онкологија, основаните сомнежи за заработка на грбот на болните пациенти, и несоодветен третман на заболените од рак се случува и денес и тоа не е престанато.
Втората работа е дека, и покрај доволните складирани количини на лекови, омилени веледрогерии на власта и денес набавувале огромни колични лекови за суми кои се изразени во милиони евра.
Трето се сознанијата дека лековите за болните од рак на Клиниката за радиологија и онкологија биле давани на рака на пациентите, во торбиче, спротивно на медицинските протоколите. За тоа Клиниката фактурирала како таа да ги аплицирала лековите, а чија судбина и начин на употреба поматаму не е позната – рече пратеничката Мизрахи.
Мизрахи вели дека ова е грозоморен скандал, во кој се прави заработка од тешката болест на многу луѓе.
– Ова значи дека дивото месо е длабоко вкореното во здравствениот систем. Овде се работи за мафијашки систем на злоупотреба на скапа терапија на клиниката за Онкологија кој траел вклучително и во 2023 година, што предизвикало екстремен трошок за здравството, штета на буџетот и најстрашно од се, сето ова е правено на сметка на пациенти кои или не добивале терапија или ненавремено ја добивале. Јавноста заслужува одговори.
Денес е последниот ден за сослушување на сведоци и експерти на анкетната комисија за истражување на случајот за Онкологија. Досега се сослушани 49 сведоци и експерти, а 10 лица не се појавија иако беа уредно поканети и имаа обврска да се појават.
Овие нови сознанија за случувањата на Онкологија ја наметнува потребата да се испитаат сите нови информации и да се продолжи рокот на работата на комисијата и да се прошири опфатот на периодот на кој таа се однесува вклучително и тековниот период од април 2023 година на кој се однесува извештајот на ФЗО. Вистината за канцер мафијата мора да се знае. Одговорност за дивото месо во здравството ќе има, со име и презиме – рече Мизрахи на прес-конференција одржана во Собранието.
