Поранешниот претседател на шпанската фудбалска федерација, Луис Рубиалес, нема да смее да и пријде на фудбалерката Џени Хермосо, која ја напаствуваше по финалето на неодамнешното Светско првенство. Тој насилно ја бакнал фудбалерката во уста и поради тоа прво беше суспендиран со одлука на Меѓународната федерација на фудбалски асоцијации (ФИФА), а сега шпанскиот суд му изрече забрана да се доближува на поблиску од 200 метри од неа. Исто така, на рубиалес му е забрането да комуницира со неа.
Рубиалес се бранеше од обвинувањата за злоупотреба и критиките, тврдејќи дека ја бакнал фудбалерката во уста со взаемна согласност, но Хермосо го негираше тоа тврдење и рече дека по тој инцидент се чувствувала како жртва на агресија. Против него поднела и кривична пријава, а државните органи му поднеле пријава за сексуален напад и принуда, бидејќи наводно ја принудил фудбалерката да зборува во негова одбрана по избивањето на светскиот скандал.
