„Според оваа емоција што ја чувствувам овде и онаа емоција и енергија што ја чувствувам насекаде низ Македонија значи дека на 8 мај ќе ни донесе историски резултат, подобар од оној кој што се случи на првиот круг на претседателски избори. Сепак 2:1 резултат во однос на освоени гласови помеѓу идниот претседател професорката Гордана Силјановска Давкова и досегашниот сега и веќе поранешен претседател, Стево Пендаровски е нешто кое што за првпат се случува во македонската демократска историја. Ова го истакна претседателот на ВМРО-ДПМНЕ, Христијан Мицкоски од митингот во Маврово Ростуше.
– Многу работи се изнаслушав овие 6 години откако сум претседател на партијата, и многу работи како што тие ги замислиле не излегоа како што тие ги кажуваа. Можам да кажам слободно дека ништо не излезе така како што тие кажуваа – рече Мицкоски говорејќи дека на СДСМ прогнозите не им излегоа како што тие замислуваа.
Лидерот на ВМРО-ДПМНЕ истакна дека на СДСМ ништо нема да им се оствари бидејќи граѓаните гледаат кој мисли добро на Македонија и дека Гордана Силјановска Давкова и ВМРО-ДПМНЕ ќе бидат победници на 8 мај.
– 183.000 гласови разлика сепак е нешто што испишува историја. Последниве години ВМРО-ДПМНЕ заедно со народот испишува историја. Така беше и пред две и половина години на локалните избори кога за првпат една коалиција, политичка партија во независна Македонија од позиција на опозиција заедно со народот успеа да победи во мнозинството општини во Македонија и да освои мнозинство градоначалници – потсети Мицкоски.
Тој посочи дека таа историја од локалните избори продолжи да се испишува и во првиот круг на претседателски избори и така ќе продолжи и на 8 мај.
– По 8 мај ќе отвориме нова страница за Македонија и ќе ја направиме Македонија онаква каква што нашите генерации сонуваа да биде. Ќе започне процесот на трансформација на Македонија. Доста беа порази, понижувања и грабеж. Ќе отпочне Македонија со својот развој, да бидеме лидери во регионот, да се вратиме во првите пет во Европа – порача Мицкоски.
Тој истакна дека за Македонија доаѓаат подобри времиња со новата влада предводена од ВМРО-ДПМНЕ.
