Војската на Тајван издаде соопштение во кое се вели дека нивните сили се во состојба на готовност и внимателно ги следат кинеските вежби.
„Министерството за национална одбрана нагласува дека ќе се придржува до принципот на подготовка за војна без да бара војна, и со став да не ескалира конфликтот и да предизвикува спорови“, се вели во соопштението.
Соодветно на тоа, беа одржани вежби за цивилна одбрана и беа објавени известувања во одредени засолништа во случај на воздушен напад.
„Ирационалното однесување на Кина има намера да го промени статус квото и да го поткопа регионалниот мир и стабилност“, соопшти Министерството.
Тајван откажа голем број летови бидејќи Кина спроведува воени вежби во близина на островот.
Најмалку 40 летови до и од Тајван се откажани, објави Чајна Тајмс, цитирајќи го аеродромот во Тајпеј, кој рече дека откажувањата на летовите не се нужно поврзани со вежбите.
Бродови на кинеската морнарица и воени авиони накратко ја преминаа централната линија на Тајванскиот теснец, изјави за Ројтерс тајвански извор запознаен со ова прашање.
Околу 10 бродови на кинеската морнарица ја преминаа централната линија и останаа во областа од средата навечер до четвртокот напладне, а повеќе кинески воени авиони накратко ја преминаа централната линија во четвртокот наутро, рече официјалниот претставник, кој сакаше да остане анонимен поради чувствителноста на предметот.
Тајван распореди ракетни системи за следење на активностите на кинеското воздухопловство во близина на централната линија, а бродовите на тајванската морнарица останаа блиску до централната линија за да ја следат кинеската поморска активност, рече официјалниот претставник.
Кина лансираше балистички ракети Донгфенг во тајванските води, потврди нејзиното Министерство за одбрана, откако претходно тајванските власти соопштија дека Кина ги лансирала ракетите во близина на нејзините острови Мацу.
Сега кинеското Министерство за одбрана соопшти дека неколку балистички ракети Донгфенг се лансирани во водите околу нејзиниот североисток и југозапад.
Во соопштението за печатот на кинеската војска, се наведува дека сите проектили ја погодиле целта: „Целата мисија за обука со жив оган беше успешно завршена“.
