Соединетите држави издадоа ново безбедносно предупредување барајќи од своите граѓани да ја напуштат Украина бидејќи се очекува да се интензивираат руските напади.
„Стејт департментот има информации дека Русија ги засилува напорите да изврши напади врз украинската цивилна инфраструктура и владини објекти во наредните денови. Руските напади во Украина претставуваат постојана закана за цивилите и цивилната инфраструктура. Амбасадата на САД ги повикува американските граѓани веднаш да ја напуштат Украина по копнен пат во приватен аранжман доколку ситуацијата дозволи“, се наведува во предупредувањето на американскиот Стејт департмент.
„Доколку слушнете силна експлозија или сирените се активираат, веднаш засолни се. Ако сте во дом или зграда, одете на најниското ниво на зградата со најмалку надворешни ѕидови, прозорци и отвори; затворете ги сите врати и седнете во близина на внатрешен ѕид, подалеку од прозорци или отвори“, се додава.
