Кинеската војска во понеделникот започна воени вежби околу Тајван, откако делегација на американски пратеници пристигна на самоуправниот остров во ненајавена посета.
„Ова е чин на одвраќање против САД и Тајван, кои ја саботираат стабилноста во теснецот“, кинескиот дневен весник Глобал Тајмс го цитираше високиот полковник Ши Ји.
Ву Кијан, портпарол на кинеското Министерство за одбрана, рече дека војската „ќе продолжи да тренира војници и да се подготвува за војна“ за решително да го заштити суверенитетот и територијалниот интегритет на Кина.
„…одлучно ќе ја уништи секоја форма на обиди за „независност на Тајван“ од сецесионисти или странско мешање“, рече Ву, додавајќи дека патувањето на американските пратеници во Тајван очигледно го прекршува принципот „Една Кина“.
Делегација на американски претставници пристигна во неделата вечерта во дводневна посета на Тајван, што најверојатно ќе предизвика дополнителни тензии со Кина.
Делегацијата ја предводи сенаторот Ед Марки и вклучува четворица членови на Претставничкиот дом.
Во понеделникот тие се сретнаа со тајванскиот претседател Цаи Инг-вен и разговараа за соработка во областа на безбедноста и синџирите на снабдување. Тие се сретнаа и со Џозеф Ву, министер за надворешни работи на Тајван.
Пекинг, кој го гледа Тајван како отцепена провинција, започна големи воени вежби околу самоуправниот остров откако претседателката на Претставничкиот дом на САД, Ненси Пелоси, го посети Тајпеј претходно овој месец.
Кина донесе одлука да ги санкционира Пелоси и членовите на нејзиното семејство. Осумте контрамерки што ги објави Пекинг вклучуваат откажување телефонски разговори меѓу американски и кинески воени претставници, работен состанок меѓу одбранбените оддели на Кина и САД и суспензија на кинеско-американската соработка за илегалната миграција, контролата на дрогата и климатските промени.
Пекинг ја санкционираше Агне Ваичиукевичиуте, заменик-министер за транспорт и врски на Литванија, за „безобразното и провокативно“ неодамнешно патување во Тајван.
