Двајца кандидати за претседател на британската конзервативна партија и владата, кои во вторникот водеа кампања во Шкотска, повторно ја отфрлија идејата за нов референдум за нејзината независност.
„Ако бидам избрана за премиер, нема да дозволам уште еден референдум“, изјави министерката за надворешни работи во заминување Лиз Трус.
Претходно, нејзиниот ривал, поранешниот министер за финансии Риши Сунак, рече дека не може „да ги замисли околностите во кои“ ќе се согласи да одржи нов референдум доколку дојде на Даунинг стрит.
Сунак и Трус изјавите ги дадоа за време на вечерниот митинг во Перт, пред членовите на Конзервативната партија.
„Ќе се фокусирам на одбраната на единството“ на Шкотска и на остатокот од Обединетото Кралство, истакна Сунак, критикувајќи ја „шаховската игра“ на Шкотската национална партија (СНП) на премиерот Никола Старџен.
И покрај постојаното одбивање од британската влада, шкотскиот лидер има намера да распише нов референдум за независност на Шкотска на 19 октомври 2023 година, девет години по референдумот на кој 55 отсто од гласачите беа за останување во составот на Обединетото Кралство. „Ние не сме само соседи, ние сме семејство. Нема да дозволам нашето семејство да се распадне“, рече претходно Трус, кој има голема можност да го наследи Борис Џонсон.
Како и Трус, Сунак рече дека другите прашања се поважни бидејќи Британија се бори со највисоката инфлација во последните 40 години.
И покрај одлуката на референдумот во 2014 година, Старџен смета дека околностите се промениле со Брегзит, бидејќи 62 отсто од Шкотите во 2016 година биле за останување во Европската унија. СНП сака Шкотска да влезе во ЕУ како независна земја.
На 11 и 12 октомври британскиот Врховен суд треба да одлучи дали шкотскиот парламент може да донесе закон за распишување референдум без согласност на британската влада.
Во кампањата, Трус и Сунак сакаат да ги освојат гласовите на членовите на Конзервативната партија – околу 200.000 од нив – кои треба да изберат нов лидер по поштенско гласање до 2 септември.
Бидејќи партијата има мнозинство во парламентот, победникот ќе ја извршува и функцијата премиер и ќе го наследи Борис Џонсон, кој поднесе оставка на почетокот на јули по серија скандали. Трус води во анкетите. Објавувањето на резултатите се очекува на 5 септември.
