Во средата вечерта, украинскиот претседател Володимир Зеленски повика на меѓународна истрага за соборувањето на рускиот авион. Според Москва, во него загинале 65 украински воени затвореници. Во своето редовно обраќање, Зеленски не ги потврди ниту ги демантираше руските тврдења дека авионот бил соборен од украинските сили.
„Очигледно е дека Русите си играат со животите на украинските затвореници, со чувствата на нивните роднини и со емоциите на нашето општество“, изјави украинскиот претседател Володимир Зеленски неколку часа по падот на авионот во руската погранична област Белгород.
Тој додаде дека неговата влада ќе инсистира на меѓународна истрага за инцидентот, за кој Русија директно ја обвини Украина, велејќи дека станува збор за терористички акт.
Руските власти тврдеа дека украинските затвореници требало да бидат пренесени во Белгород бидејќи истиот ден требало да бидат разменети за заробени руски војници. Фактот дека размената требаше да се одржи во среда, но подоцна беше откажана, беше потврдено и во Киев.
Рускиот авион во средата околу 11 часот по локално време или околу 9 часот по средноевропско време се урна во близина на селото Јаблоново, на околу 70 километри од украинско-руската граница. Според Москва, покрај 65-те украински воени заробеници, во авионот имало и шест членови на екипажот и тројца придружници, од кои сите загинале.
Портпаролот на Кремљ, Дмитриј Песков, предупреди во Москва дека инцидентот може да влијае на понатамошната размена на затвореници со Украина. Според Киев, има повеќе од 8.000 Украинци во руско заробеништво, од кои повеќе од 1.600 се цивили, пренесува француската новинска агенција АФП.
