Во руските затвори има неколку илјади украински цивили, вклучително и градоначалници кои беа приведени во окупираните региони, изјави во четвртокот украинскиот претседател Володимир Зеленски.
„Најмалку шест градоначалници и водачи на заедниците во моментов се во руско заробеништво“, рече украинскиот претседател Володимир Зеленски во видео обраќањето на конференцијата за човекови права во Киев. Досега се ослободени 3.767 Украинци, главно воени заробеници. Неколку илјади луѓе остануваат во руско заробеништво, вклучително и многу кои се во затвор од 2014 година, додаде Зеленски.
Украинскиот омбудсман Дмитро Лубинец, пак, на конференцијата зборуваше за повеќе од 16.000 цивили во руско заробеништво. „Кога ќе ја ослободиме украинската територија, бројот ќе биде многу поголем“, продолжи тој и објасни дека дури тогаш ќе може темелно да се провери бројот на затвореници, пренесува германската новинска агенција dpa.
Во четвртокот рускиот претседател Владимир Путин го назначи пратеникот Александар Кинштајн за нов гувернер на областа Курск во Русија, чиј дел е под контрола на украинските сили. Како што појасни, во регионот е потребен кризен менаџмент. Кинштајн на тој начин го замени Алексеј Смирнов, кого Путин го назначи на позицијата гувернер во мај.
Во меѓувреме, Украина и Русија известуваат за нови напади со беспилотни летала.
Прорускиот гувернер на регионот Керсон во Украина, Владимир Салдо, денеска соопшти дека нападот со украински беспилотни летала врз Олешки однел три животи, а повредени се уште тројца. Како што објасни, беспилотните летала биле упатени на локација за дистрибуција на помош. Со оглед на тоа, тој го обвини Киев дека намерно напаѓа цивили, пренесува француската новинска агенција АФП.
Во меѓувреме, украинските региони Харков, Полтава, Суми, Киев, Житомир и Чернихив беа цел на напади со руски беспилотни летала ноќе. Според украинските сили, противвоздушната одбрана соборила 32 од 53 беспилотни летала, објави украинската новинска агенција Укринформ.
