Украинскиот претседател Володимир Зеленски во средата ја посети Велика Британија, каде што му беше ветено дека украинските пилоти ќе можат да тренираат со борбени авиони на НАТО, што е голем симболичен чекор во поддршката на Западот за Киев.
Лондон беше првата станица на неговото второ патување во странство откако Русија ја започна својата инвазија на Украина на 24 февруари минатата година. Европски дипломат изјави дека Зеленски в четврток ќе го посети Брисел каде ќе се одржи самитот на ЕУ.
„Обединетото Кралство беше меѓу првите кои ѝ помогнаа на Украина. И денеска сум во Лондон за лично да се заблагодарам на британскиот народ за поддршката и на премиерот Риши Сунак за неговото лидерство“, објави Зеленски на социјалните мрежи под фотографијата со британскиот премиер на аеродромот Стенстед.
Предвидено е Зеленски да се сретне и со британскиот крал Чарлс Трети, да се обрати во британскиот парламент и да ги посети украинските војници кои се на обука во Британија.
„Посетата на претседателот Зеленски на Обединетото Кралство е доказ за храброста, решителноста и борбата на неговата земја и доказ за нераскинливото пријателство меѓу нашите две земји“, рече Сунак.
Канцеларијата на Сунак најави дополнителни санкции против Русија и планира да ја забрза испораката на воена опрема за Киев.
Украинските воздухопловни сили и маринци за првпат ќе бидат вклучени во британската програма за обука.
„Обуката ќе обезбеди пилотите да летаат со софистицирани борбени авиони според НАТО стандардите во иднина“, се вели во соопштението.
Тоа е важен чекор во поддршката на Западот за Украина, бидејќи западните земји засега се воздржуваат од испраќање борбени авиони и друго оружје што може да таргетира длабоко на руска територија.
Не е познато кога ќе се одржи обуката, а британските власти рекоа дека обуката на пилотите да управуваат со британски авиони трае со години.
Но, првото ветување во овој поглед е знак за поддршка на долгорочните безбедносни односи со Киев и може да го отвори патот за распоредување на сојузничките авиони.
Минатиот месец Велика Британија беше првата на Запад која вети тенкови на Киев. Понуди само 14, но во рок од две недели САД и другите европски сојузници ветија уште десетици, ставајќи крај на долготрајната дебата за ова прашање.
Американскиот претседател Џо Бајден минатиот месец изјави дека Вашингтон нема да испрати американски авиони Ф-16 во Украина, а британските власти рекоа дека на британските авиони им треба премногу обука за да бидат корисни сега. Но, Франција и Полска ја оставија отворена можноста за испраќање на авионот како дел од заедничката сојузничка одлука.
