Во текот на вчерашниот дена на територијата на Македонија имаше вкупно 30 пожари на отворен простор. Од нив сè уште се активни 9 пожари, 6 се ставени под контрола (пожари кои не можат да се шират но сè уште има горење), а 15 пожари се целосно изгаснати, изјави денеска директорот на Центарот за управување со кризи (ЦУК) Стојанче Ангелов.
Тој истакна дека во претходните денови имало случаи кога изгаснати пожари повторно се разгорувале.
Во согласност со проценетите ризици и опасности, според информациите кои ЦУК ги има во овој момент, утрово во гаснењето на пожарите приоритет ќе бидат пожарот во Општина Чашка, селата Габровник, Мокрени, Јаболчиште, Дреново врв Лисец. Ќе бидат ангажирани два хеликоптери (МВР и АРМ), со дополнителни ангажирани локални сили и поддршка од 55 припадници на Армијата.
Потоа во Општина Македонски Брод, село Тажево кон село Брезница ќе биде ангажиран хеликоптер на АРМ (Ми 17), со дополнителни ангажирани локални сили и поддршка од 30 припадници на Армијата.
Во гаснењето на пожарот во Општина Кавадарци, село Фариш, ќе дејствуваат два ер трактори од ДЗС, со дополнителни ангажирани 20 припадници на САЕ Тигар на МВР.
За Општина Градско, Криволак кон Брегалница, во гаснење на пожарот кој доаѓа од Криволак, ќе бидат ангажирани 30 припадници на САЕ Тигар.
Останати активни пожари на отворено се во Општина Чашка, во селата Јаболчиште, Дреново врв Лисец, во Општина Долнени, село Небрегово, во Општина Пробиштип, место викано Балабаница, село Зелен Град, во Општина Македонски Брод, село Брзеница (ново жариште), како и во Општина Чашка, место викано Мукус, префрлен од Прилеп.
