Коментари се редат на социјалните мрежи во врска со украинскиот напад со дрон врз станбена 38-катница во рускиот град Саратов. За нападот јави руската информативна агенција РИА. На снимката може да се види како дрон се урива во еден од горните катови на зградата. Саратов се наоѓа на 900 километри од украинската граница, пишува Ројтерс. Аеродромот во градот ги откажа летовите.
Според руското Министерство за одбрана, над Саратов биле соборени девет украински дронови.
– Една жена е хоспитализирана во тешка состојба. Лекарите се борат за нејзиниот живот – изјави на Телеграм регионалниот гувернер на Саратов, Роман Бусаргин, во врска со нападот.
Претходно, Бусаргин рече дека службите за итни случаи се развиле на погодените места во Саратов и Енгелс, клучни градови во регионот неколку стотици километри југоисточно од главниот град.
Русија има воена база за стратешки бомбардери во Енгелс, која Украина ја нападна многу пати од почетокот на војната.
Украинскиот напад доаѓа во време кога Русија утрово изврши ракетирања врз Киев и повеќе региони низ Украина. Поголемиот дел од Киев е без струја, објави градоначалникот, додека главната енергетска компанија „Укренерго“ рече дека работи на враќање на енергијата.
Шефот на администрацијата на градот Лавов, Максим Козицки, на Телеграм соопшти дека руските сили нападнале енергетски капацитети во Лавовската област и затоа имало делумни прекини на струја во Лавов и регионот. Критична инфраструктура е нападната во Запорожје, во Кировоград, областа Полтава, во Житомир нема вода, а по воздушниот напад во Одеса привремено снема струја и вода.
На социјалните мрежи се појавија мапи од рускиот напад каде се вели дека, освен ракети, се користени и дронови „шахед“.
Шефот на кабинетот на претседателот на Украина, Андриј Јермак изјави дека желбата да се уништи енергетската индустрија, како што наведе, „скапо ќе ги чини Русите и нивната инфраструктура“.
