Украина планира да ги тужи Полска, Унгарија и Словачка поради забраната за увоз на украински земјоделски производи, изјави украинскиот трговски претставник Тарас Качка во интервјуто објавено во понеделникот за Политико.
Забраните на владите на три централноевропски земји имаат за цел да ги заштитат сопствените земјоделци од жито од Украина, по руската блокада на украинските пристаништа на Црното Море.
Владејачката партија во Полска е особено заинтересирана да го запре тој проток бидејќи нејзиниот успех на изборите на 15 октомври е тесно поврзан со поддршката на руралното население кое е огорчено од зголемениот увоз на украински земјоделски производи.
„Важно е да се докаже дека овие постапки се правно погрешни. И затоа утре ќе започнеме судски постапки“, рече Качка во неделата навечер, додавајќи дека Киев планира да возврати со мерки против извозот на полско овошје и зеленчук.
„Ќе бидеме принудени да возвратиме со дополнителни производи и ќе го забраниме увозот на овошје и зеленчук од Полска“, изјави тој за Политико.
Трите земји се побунија против Европската комисија, која минатиот петок одлучи да дозволи продажба на украинско жито низ ЕУ.
