Еден косовски полицаец е убиен, а друг повреден во пукање во село во северно Косово рано во неделата, изјави премиерот Албин Курти.
„Во овој момент сè уште трае пукањето од огнено оружје од различен калибар (насочено) против нашата полиција“, напиша Курти во објавата на Фејсбук, опишувајќи го инцидентот како терористички чин.
„Напаѓачите се професионалци кои носат маски и се тешко вооружени“, додаде тој.
Тензиите се високи во Косово по судирите во мај во кои беа повредени повеќе од 90 мировници на НАТО и околу 50 српски демонстранти во северно Косово.
Новата рунда преговори што се одржа минатата недела под покровителство на Европската унија за нормализација на односите меѓу Белград и Приштина не донесе никаков напредок.
Високиот претставник на ЕУ за надворешна и безбедносна политика Жозеп Борел го обвини премиерот Курти дека не е подготвен да прифати компромисен предлог за тоа како да се пристапи кон спроведувањето на договорот за нормализација на односите со Србија од февруари и март оваа година за воспоставување на заедница на општини со српско мнозинство на северот на Косово.
