Бројот на загинати во шумскиот пожар што го намали туристичкиот град Лахаина на хавајскиот остров Мауи на урнатини се искачи на 53 во четвртокот, соопшти округот Мауи.
Најмалку три големи пожари избувнаа во вторникот вечерта на Мауи, отсекувајќи ја западната страна на островот и историскиот град Лахаина, каде што беа уништени или оштетени најмалку 271 градба.
Најмалку 53 лица загинаа, многу повеќе луѓе се здобија со изгореници, вдишување чад и други повреди. Продолжуваат напорите за пребарување и спасување, а илјадници луѓе ја напуштија областа.
„Додека продолжуваат напорите за гаснење, денеска се потврдени 17 дополнителни смртни случаи поради активниот шумски пожар во Лахаина. Со ова бројот на загинати се искачи на 53“, се вели во соопштението за печатот на округот Мауи.
Пожарите направија пепел цели населби на западната страна на американскиот остров. Лахаина е една од главните атракции на Мауи, која секоја година привлекува два милиони туристи на островот, или околу 80 отсто од посетителите на островот.
Шумските пожари ги изненадија повеќето жители на Лахаина и посетителите кога избувнаа, принудувајќи некои да скокнат во океанот за да избегаат од пеколот што брзо се движи.
Никоанџело Никербокер, 21-годишен жител на Лахаина, штотуку се разбудил од попладневната дремка во вторникот вечерта кога видел како пожарите горат низ неговиот роден град. Неговата мајка и сестра избегале, додека тој и некои пријатели отишле во куќите на соседите, помагајќи им на луѓето да се спакуваат и неуспешно се обидувале да го запрат пламенот со градинарски црева.
„Беше толку жешко насекаде околу мене, се чувствував како мојата кошула да се запали“, рече тој од едно од четирите засолништа за итни случаи отворени на островот. Повеќе од 2.100 луѓе се сместени во засолништа, пишува Hawai News Now.
Никербокер слушнал експлозија на автомобил и бензинска пумпа, а набргу потоа побегнал од градот со својот татко, земајќи ја со себе само облеката што ја носеле и семејното куче. „Звучеше како да се води војна“, рече тој.
Најмалку 20 луѓе претрпеа сериозни изгореници, а неколку се пренесени со хеликоптер во Оаху на лекување, додека повеќе од 11.000 посетители беа евакуирани од Мауи, изјави Ед Снифен од Одделот за транспорт на Хаваи доцна во средата.
Иако најмалку 16 патишта се затворени, аеродромот е целосно оперативен, рече тој.
Пожарите се најголемата катастрофа што ги погоди Хаваите од 1960 година, една година откако стана американска држава, кога цунами уби 61 лице.
