Напаѓачот на репрезентацијата на Португалија и саудискиот клуб Ал-Наср, Кристијано Роналдо постави светски рекорд по бројот на одиграни натпревари на меѓународно ниво, објави Меѓународната федерација за фудбалска историја и статистика (ИФФХС).
Роналдо постигна два гола на пријателскиот натпревар помеѓу Португалија и Ирска (3:0), кој беше број 1.226 за напаѓачот. На овој резултат, тој го надмина поранешниот голман на Бразил и Сао Паоло, Рожерио Цени, кој има 1.225 настапи. Според статистиката, Роналдо има учествувано на 698 натпревари во првенствата на Португалија, Англија, Шпанија, Италија и Саудиска Арабија. Португалецот има уште 101 натпревар во Куп и Супер куп турнирите на овие земји. Покрај тоа, напаѓачот има одиграно 220 натпревари во клупските натпреварувања и 207 за репрезентацијата на Португалија.
Роналдо стигна и до вкупно 895 голови во кариерата.
Но, првиот гол што брилијантно го постигна за Ирска е историски. Со него Роналдо стана првиот играч кој постигнал гол за репрезентацијата во 21 различна година. Првиот гол за Грција го постигна на ЕВРО 2004, што беше прво Европско првенство во неговата кариера. И сега, по чудесниот голгетерски подвиг, го чека шестото Европско првенство. Прв противник на Португалија во групата ќе биде Чешка на 18 јуни. Следува дуелот со Турција на 22 јуни, додека во третото коло ќе игра против Грузија на 26 јуни.
Овој шампионат ќе биде посебен за еден од најдобрите фудбалери во историјата – Кристијано Роналдо.
Имено, фудбалерот на Ал Наср по шести пат ќе се појави на европска сцена и со тоа ќе стане апсолутен рекордер, откако тоа досега на никој не му успеало.
Роналдо дебитираше во 2004 година, кога домаќин беше Португалија, која потоа стигна до финалето, но Грција победи со резултат 1:0.
На тој турнир постигна два гола.
Следното Европско првенство го играше во 2008 година во Австрија и Швајцарија, а Роналдо постигна еден гол, а неговата репрезентација беше поразена од Германија во четвртфиналето.
Во 2012 година домаќини беа Полска и Украина, а Роналдо постигна три гола, а Португалија загуби од Шпанија на пенали.
По ова првенство, во 2016 година во Франција, Роналдо се искачи на тронот на Европа. Потоа постигна три гола, а Португалија во големото финале го совлада домаќинот Франција со гол во последните минути од судиското продолжение. Кристијано мораше да ја напушти играта порано поради повреда.
Поединечно, најдоброто Европско првенство за него дојде во 2021 година, кога постигна 5 гола, но неговата репрезентација беше елиминирана во осминафиналето од Белгија.
Роналдо е апсолутен рекордер на Европските првенства.
Има најмногу настапи – 25, најдобар стрелец е со 14 постигнати голови и играч со најмногу одиграни турнири – 6.
Триесет и девет-годишниот Роналдо е петкратен освојувач на „Златната топка“, петкратен освојувач на Лигата на шампионите, европски првак и освојувач на Лигата на нации. Португалецот е најдобар стрелец во историјата на репрезентациите, европските првенства, Лигата на шампионите и Светското клупско првенство. Во текот на својата кариера, тој играше за Реал Мадрид, станувајќи најдобар стрелец во историјата на клубот, за англискиот Манчестер Јунајтед, италијанскиот Јувентус и португалскиот Спортинг (Лисабон). Во декември 2022 година, Роналдо се пресели во Ал-Наср од Саудиска Арабија.
