Ана Лоренци, 20-годишна девојка од Верона, се удави вчера во езерото Гарда во северна Италија додека се обидувала да го спаси од давање својот 14-годишен брат, пишува италијанската агенција Анса.
Трагедијата се случила во градот Корно. Дваесетгодишната Ана Лоренци, нејзиниот брат и 17-годишната сестра биле однесени од струите триесетина метри од брегот од каде што ги набљудувал нивниот татко, пренесе Анса.
Братот на Ана во еден момент се изморил од пливањето и почнал тешко да дише, па таа се обидела да му помогне, но се удавила бидејќи силна струја ја повлекла на дното.
На помош им дошле две млади момчиња кои скокнале во езерото, но за жал не успеале да ја спасат Ана. Момчето било извлечено на брегот и било пренесено во болница. Спасена била и втората сестра, а подоцна и телото на Ана било пронајдено.
