Во Корушка, Австрија, 19-годишна Австријка загина во сообраќајна несреќа во која учествуваше туристички автобус Flixbus. Повредени се уште околу 20 лица. Во автобусот имало и словенечки државјани.
Автобусот на Flixbus удрил во бетонска ограда и се превртел на регионалниот пат кај Михелдорф, северно од Шентвид об Глина, околу 4:45 часот. Во несреќата загина 19-годишна Австријка, а околу 20 лица се повредени, меѓу кои и еден германски државјанин потешко, јавува австриската агенција АПА.
Претставник на полицијата за АПА изјави дека во автобусот имало луѓе од Австрија, Словенија, Италија, Германија и Украина.
Во двокатниот автобус за време на несреќата се наоѓале вкупно 40 патници и возачот, а алкотестот бил негативен за нив, пишува весникот „Кронен цајтунг“. Според порталот на австрискиот радио и телевизиски канал ORF, автобусот се движел од Берлин кон Трст.
Кога пожарникарите и брзата помош пристигнале на местото на несреќата, некои од патниците веќе биле надвор од возилото, додека некои морале да бидат спасени бидејќи биле заробени.
Полицијата во моментов се уште ги истражува околностите на несреќата.
