Воените вежби што Кина ги започна околу островот Тајван поради посетата на високата американска функционерка Ненси Пелоси завршија вчера. Но, наместо да се смират тензиите, од правецот на Пекинг долетаа нови искри, но овој пат другата страна има одговор. Кина од денеска ќе почне со редовни воени вежби во непосредна близина на островите кои ги смета за свои, а истото ќе го прават и Тајван и САД кои учествуваат на вежби со Јапонија.
Пекинг најави дека ќе продолжи со воените вежби околу Тајван, како и дека ќе одржи уште една воена вежба во близина на јужниот дел на Жолтото Море и Бохај, во близина на Јужна Кореја. Почетокот на вежбите е закажан за понеделник и ќе трае до 8 септември.
Источната команда на „ПЛА“ објави на кинеската платформа за социјални медиуми Веибо дека ќе продолжи да спроведува координирани поморски и воздушни воени вежби околу Тајван, со фокус на вежбите на теренот за тестирање и воздушните напади со долг дострел.
Коментирајќи ги маневрите на кинеската армија во Тајванскиот теснец, премиерот во Тајпеј, Су Ченг-Чанг, оцени дека Кина „арогантно користела воени акции за да го наруши регионалниот мир и стабилност“.
Зборувајќи пред новинарите во Тајпеј, Су го повика Пекинг да не демонстрира воена сила и ги осуди „странските непријатели“ кои се обидуваат да го поткопаат моралот на тајванскиот народ со извршување на сајбер напади и кампањи за дезинформација.
Тајванскиот совет за прашања на копното (MAC) ги повика властите во Пекинг „да бидат воздржани и веднаш да престанат со сите нивни воинствено однесување“.
Советот ја обвини Кина дека продолжува со воените вежби околу Тајван „како дел од симулиран напад и блокада за заплашување на Тајван и соседните земји“.
Одговор од Тајван
Откако одекна информацијата за новите воени вежби на Кина, овој пат со зголемени ресурси, Тајван реши да одговори на идентичен начин.
Тајванското Министерство за одбрана соопшти дека биле испратени авиони и бродови за „соодветно“ да одговорат на кинеските воени вежби околу островот.
Во исто време, тајванското Министерство за транспорт објави дека летовите низ неговиот воздушен простор делумно се обновени бидејќи сѐ уште постои закана од силен кинески напад.
Сепак, Министерството во соопштението рече дека Тајван ќе продолжи да ги насочува летовите и бродовите подалеку од кинеската воена вежба во близина на неговиот источен брег до 10 часот по локално време во понеделник наутро.
Како одговор на маневарот на Кина кој ќе трае до 8 септември, војската на Тајван ќе спроведе артилериски вежби со жив оган во јужниот дел на округот Пингтунг во вторник и четврток.
Овие вежби ќе опфатат употреба на снајперисти, борбени возила, оклопни возила, како и јуришни хеликоптери.
Вклучени се и САД
Во меѓувреме и Соединетите Американски Држави најавија воени вежби во непосредна близина на Кина. Ова е потег кој дополнително ќе ги заостри односите меѓу двете најголеми светски сили.
Според објавениот извештај, САД ќе учествуваат во заедничка воена вежба со Индија која ќе биде лоцирана на помалку од 100 километри од спорната граница на таа земја со Кина.
Воените вежби ќе се одржат во средината на октомври на надморска височина од околу 3.000 метри во Аули во индиската држава Утараханд и ќе се фокусираат на обука за војување на голема височина, изјави висок офицер на индиската армија запознаен со ова прашање.
Аули е на околу 95 километри од Линијата на вистинска контрола (LAC), непријатен дел од земјата што приближно ја означува спорната граница меѓу Индија и Кина. Вежбите ќе се одржат како дел од 18-годишна заедничка вежба позната како „Јуд Абхиас“ или „Практика на војна“.
Односите меѓу Индија и Кина се затегнати откако во крвавиот конфликт меѓу нивните војници на Хималаите во јуни 2020 година загинаа најмалку 20 индиски војници и четворица кинески војници, а сега и САД се приклучуваат на и онака напнатата ситуација на Исток.
Силата на Кина против Тајван
Во случај навистина да има вооружен конфликт меѓу Кина и Тајван, една армија е далеку супериорна во овој случај. Имено, Кина има одбранбен буџет од 230 милијарди долари, наспроти 16,8 милијарди што ги издвоил Тајван.
Пекинг може да испрати два милиони војници во војната, додека армијата на Тајван брои 170.000. Нумеричка супериорност е присутна и кога се во прашање тенковите, од кои Кина има 510.000, а Тајван само 1.100.
Кинеското воздухопловство располага со 3.285 борбени авиони, додека островот што Пекинг го смета за своја територија има 741 борбен авион.
