Генералниот секретар на НАТО, Јенс Столтенберг на прес конференцијата што се одржа синоќа во Вашингтон, се осврна на прашањата за понатамошното зацврстување на одбранениот потенцијал на воената алијанса и многустраната помош за Украина која ја одбива руската агресија.
Во текот на излагањето тој истакна дека НАТО е најуспешната воена алијанса во историјата, пренесе дописникот на МИА од Вашингтон.
Столтенберг рече дека мнозинство од земјите сега доделуваат за одбрана 2% од својот национален буџет, во споредба со тоа како било пред 3 години кога само неколку земји доделувале толку за одбрана.
Шефот на НАТО уште еднаш истакна дека помошта на земјите членки за Украина не е да се пролонгира војната туку „брзо да се реши“.
– Ако Украина ја изгуби војната тоа нема да донесе мир, туку ќе донесе уште повеќе руска окупација. Затоа ние ќе ја подржуваме Украина таа да победи и ќе бараме праведен мир – рече генералниот секретар на НАТО.
Според Столтенберг, Кина е „овозможувач“, па дури и „помошник“ на руската агресија, бидејќи Пекинг пружа воено-техничка помош на Москва „како микро-електронски компоненти за двојна намена“ што му овозможува на Кремљ да ја води таа војна продолжително време. Столтенберг рече дека со заедничката декларација членките на НАТО испратиле јасен сигнал до Кина за тоа дека таквата улога на Пекинг е неприфатлива.
Декларацијата е составена од силен речник насочен против Кина и нејзината улога на овозможувач на војната во Украина.– Сметам дека тоа е многу силен и многу јасен сигнал и ние прецизно ја одредуваме одговорноста на Кина кога станува збор за нејзиното соучесништво во војната со Русија – истакна Столтенберг додавајќе дека „ова е најсилната порака досега против Кина формулирана од сојузниците“.
Во одговор на прашања од новинарите за тоа каков ќе биде одговорот на Алијансата ако Кина започне, не само со техничко но и со директно снабдување на Русија со оружје и воена техника, Столтенберг рече дека тоа ќе предизвика голема загриженост на Запад. Тој стави до знаење дека во тој случај ќе бидат преземени одредени санкции против Кина што би влијаело на репутацијата на таа земја во светот.
Во одговор на прашање за тоа како може да се измени улогата на САД во алијансата по претседателските избори во ноември оваа година, шефот на НАТО изрази увереност дека САД ќе продолжат да играат лидерска улога во НАТО и во иднина, бидејќи тоа е во склад со националните интереси на оваа земја.
Покрај тоа Столтенберг истакна дека во Вашингтон се сретнал со американските законодавци кои уште еднаш го убедиле дека во САД постои силна двопартиска подршка за НАТО и подршка за Украина.
Столтенберг го нарече НАТО најуспешната воена алијанса во историјата. Тој уште еднаш истакна дека алијансата има за цел во иднина да ја прими и Украина во своите редови.
Генералниот секретар на НАТО се осврна и на прашањето за тоа зошто НАТО отвори свое преставништво во Јордан, истакнувајќи дека алијансата реагира на предизвиците и можностите што доаѓаат од Блискиот Исток и Северна Африка.
Столтенберг истакна дека НАТО отворило ново одделение за заедничка анализа во Полска, а претходно изјави и дека лидерите на НАТО се договориле за пакет помош за Украина кој предвидува создавање на центар за команда во Германија, билатерални договори за безбедност со сојузничките земји, нов пакет воена помош и работа за оперативна хармонизација.
