Снегот кој продолжува да паѓа предизвика големи проблеми особено во сообраќајот во Србија и Хрватска.
Во неколку области на запад и југ од Србија до среда се очекуваат нови 20 до 40 сантиметри снег, а во планинските области и до 50 сантиметри, соопшти Републичкиот хидрометеоролошки завод (РХМЗ) на Србија.
Според прогнозите, снежната покривка ќе се згусне и во Белград за десет до 15 сантиметри, каде има проблеми во сообраќајот. Снег ќе паѓа главно во западниот дел на Србија каде е на сила црвено предупредување.
ЕП: Снегот ја влоши состојбата, 127 илјади домаќинства во БиХ се без струја
Невремето во последните два дена предизвикува големи главоболки на подрачјето на Далмација во Хрватска. Пожарникарите во Сплит отстранија неколку паднати дрвја и улични светилки кои оштетија паркирани возила.
Проблеми поради ветрот има и во другите делови на јадранското крајбрежје, а поради силниот ветер пожарникарите неколкупати мораа да интервенираат и во Загреб.
На некои места во Далмација ветерот достигна брзина од 120 километри на час, поради што се уште се во прекин бројните фериботски врски.
Поради ветерот и снежните наноси затворена е и делницата од автопатот А1 што го поврзува Загреб со Далмација.
Метеоролозите предупредуваат дека невремето ќе продолжи и денеска, што значи дека постои можност снегулките со помош на ветерот да стигнат до крајбрежните области.
