Нарко-босот Дарко Шариќ е осомничен дека го убил својот близок соработник Милан Миловац наречен Цигла, дознава КРИК. Миловац беше еден од главните луѓе на Шариќ за шверц на кокаин, а пред две години беше осуден на 11 години затвор додека беше во бегство.
Причината поради која Шариќ е уапсен денеска е сомнежот дека тој го организирал убиството на некогашниот близок соработник Милан Миловац минатата година во Еквадор, открива КРИК.
Миловац се сметаше за еден од клучните луѓе во картелот Шариќ и беше обвинет во Србија во 2011 година како дел од криминална група која шверцувала кокаин од Јужна Америка во Европа. Според ова обвинение, Миловац бил задолжен за Италија – тој договарал продажба на кокаин на италијански криминалци и организирал пониски членови на групата кои доставувале дрога.
Обвинението ја опишува продажбата на 100 килограми кокаин кој пристигнал во Италија од Јужна Америка, а кој бил организиран од Миловац. Имено, тој во октомври 2008 година им наредил на другите членови на групата да ја пренесат оваа дрога од магацинот во Пиза до Милано, а за транспортот бил задолжен Милан Пуљаревиќ, кој имал улога на курир во групата. Но, не знаеле дека ги следи италијанската полиција која го запрела Пуљаревиќ на автопатот кон Милано. Полицијата пронашла кокаин во скриени бункери во автомобилот и го уапсила Пуљаревиќ.
Во тој момент полицијата ги прислушувала членовите на групата на Шариќ, па во еден од разговорите се слушнало како непознато лице вознемирено го известува Миловац дека Пуљаревиќ не одговара и бара од него да му се јави. Во разговорот, лицето споменува криминалци кои сакале да купат дрога, а Миловац го предупредува да не ги кажува нивните имиња по телефон, што покажува дека членовите на групата биле внимателни и веројатно знаеле дека полицијата ги прислушува.
Иако е обвинет за ова, Миловац никогаш не влегол во судница – избегал пред полицијата да успее да го уапси во 2009 година во акцијата „Балкански воин“ во која беа убиени и други соработници на Шариќ, а тој никогаш не беше уапсен. Тогаш и Шариќ избега, но се предаде во 2014 година и оттогаш е во притвор, додека на крајот на минатата година не беше пуштен во домашен притвор.
На Миловац му се судеше во отсуство, па со пресудата со која Шариќ беше осуден на 15, тој беше осуден на 11 години затвор. Во меѓувреме оваа пресуда падна, па во февруари годинава од почеток почна судењето пред Апелацискиот суд во Белград.
Се испоставило дека тој бил во Јужна Америка за време на судењето, а не добил правосилна пресуда бидејќи бил убиен минатата година во Еквадор.
