Израелскиот парламент ја одобри владата на национално единство на премиерот Бенјамин Нетанјаху, која вклучува неколку пратеници од центристичката опозиција и беше формирана среде војната со Хамас во Појасот Газа. Поранешниот министер за одбрана Бени Ганц и членовите на неговата мала центристичка партија ќе се приклучат на коалицијата на Нетанјаху, една од најдесничарските влади во историјата на Израел, на која Ганц досега жестоко се спротивставуваше. Врховниот воен командант на Израел рече дека „сега е време за војна“, бидејќи неговата земја натрупува тенкови во Појасот Газа пред планираната инвазија за уништување на палестинската милитантна група Хамас, која владее со енклавата. Во обид да добие поддршка за својот одговор, израелската влада им покажа на американскиот државен секретар Антони Блинкен и на министрите за одбрана на НАТО слики од деца и цивили за кои рекоа дека биле убиени од Хамас за време на викендот во Израел.
Израел ја бомбардираше Газа како одмазда за дивеењето на Хамас во јужните израелски градови во кое загинаа најмалку 1.300 луѓе. Најмалку 1.500 Палестинци беа убиени во Газа, а цел на Израел беше и либанскиот Хезболах.
Хјуман рајтс воч во четвртокот го обвини Израел дека користи муниција со бел фосфор во воените операции во Газа и Либан, велејќи дека употребата на такво оружје ги става цивилите на ризик од сериозна и долгорочна штета. Запрашана да ги коментира наводите, израелската армија одговори дека „во моментов не знае за употребата на оружје што содржи бел фосфор во Газа“. Тие не ги коментираа тврдењата за употреба во Либан, пренесува Ројтерс.
