Претседателот на Бугарија Румен Радев пред денешниот самит на Европскиот совет во Брисел се осврна на прашањето за пролонгирање на влезот на Бугарија во Шенген зоната и рече дека земјата ги исполнила сите услови за влез во Шенген.
Разочаран од одлуката на министрите пред неколку дена, Радев изјави дека Бугарија ги исполнила сите барања на ЕУ уште во 2011 година, пренесе кликс.ба.
– Ги исполнивме сите критериуми уште во 2011 година. Сè друго се внатрешни политики на државите кои се жалеа. Не можам да зборувам за бројките на мигрантите кои минуваат низ Бугарија. Повеќето од нив доаѓаат преку други рути. Ние сме посветени на заштита на нашата граница. Тројца наши граничари загинаа, беа убиени штитејќи ја границата. Овие луѓе ги дадоа животите штитејќи ја надворешната граница на ЕУ и земјите северно и западно од нас – рече Радев.
Тој исто така нагласи дека очекува Бугарија да биде третирана исто како и другите земји-членки на ЕУ.
– Бараме Бугарија да се третира исто како и другите земји. Бев во комуникација со австрискиот премиер Нехамер, со претседателот на Австрија и верувам дека заедно можеме многу брзо да најдеме решение. Правиме сè што можеме за да ја заштитиме надворешната граница на ЕУ. Не нè оставајте сами. Ниту една земја сама не може ништо да направи – заклучи Радев.
Хрватска од 1 јануари 2023 година ќе стане членка на Шенген зоната, а Бугарија и Романија уште чекаат влез во Шенген.
– Ја поздравувам одлуката за влез на Хрватска во Шенген зоната, но изразувам разочарување што истото не е направено за Бугарија и Романија – истакна претседателката на европскиот парламент, Роберта Мецола.
Таа се осврна и на корупцискиот скандал во кој е вмешана и поранешната потпретседателка на ЕП, Ева Каили.
– Тоа е силен удар за демократијата и за сето она што досега го направивме. На овој самит ќе испратам порака дека нема да ги туркаме работите под тепих. Ќе направам сè што можам заедно со моите колеги да го вратиме позиција на Европскиот парламент како дом на демократијата.чиста, транспарентна и не за продажба – посочи Мецола.
На денешната седница министрите треба да ја потврдат и препораката на Европската комисија за доделување кандидатски статус на Босна и Херцеговина.
